ഷാര്‍ജ: ഷാര്‍ജ വില്ലയിലുണ്ടായ തീപിടിത്തത്തില്‍ മൂന്നു പേര്‍ മരിച്ചു. ഷാര്‍ജ വനിതാ ബിസിനസ് കൗണ്‍സില്‍ ചെയര്‍പേഴ്‌സണ്‍ അമീറ ബിന്‍കറമും മാതാവും സഹോദരിയുമാണ് മരിച്ചത്. അല്‍ ഖദ്‌സിയ പ്രദേശത്ത് അമീറയുടെ വില്ലയില്‍ ശനിയാഴ്ചയാണ് ദുരന്തമുണ്ടായത്. അമീറയുടെ 32 കാരനായ സഹോദരനെ രക്ഷാപ്രവര്‍ത്തകര്‍ ആശുപത്രിയിലത്തെിച്ചു. കനത്ത പുകയുണ്ടാക്കിയ ശ്വാസതടസ്സമാണ് എല്ലാവരുടെയും മരണകാരണമെന്നാണ് പ്രാഥമിക നിഗമനം.
വൈകിട്ട് നാലരയോടെയാണ് തീപ്പിടിത്തമുണ്ടായതെന്ന് ദൃക്‌സാക്ഷികള്‍ പറഞ്ഞു. വീടിന്റെ മജ്‌ലിസ് ഭാഗത്ത് തീപിടിക്കുമ്പോള്‍ വീട്ടിലുള്ളവര്‍ ഉറക്കത്തിലായിരുന്നുവെന്നു അഗ്‌നി ശമന സേന വക്തവിനെ ഉദ്ധരിച്ച് പ്രാദേശിക പത്രങ്ങള്‍ റിപ്പോര്‍ട്ട് ചെയ്തു. പുക ഇവര്‍ ഉറങ്ങിയിരുന്ന മുറികളില്‍ പടര്‍ന്നാണ് മൂവരുടെയും മരണം സംഭവിച്ചത്. തീ ആളുന്നത് കണ്ട അയല്‍വാസിയാണ് വിവരം അഗ്‌നിശമന സേനയെ അറിയിച്ചത്.
ഉടന്‍ സംഭവ സ്ഥലത്തത്തെിയ സേന സഹോദരനെ ചികിത്സക്കായി അല്‍ ഖാസിമി ആശുപത്രിയില്‍ എത്തിച്ചു. മണിക്കൂറുകള്‍ക്കു ശേഷമാണ് തീയണക്കാനായത്. സംഭവം നടക്കുമ്പോള്‍ പിതാവ് വീടിന് പുറത്തായിരുന്നു. അപകട കാരണം വ്യക്തമല്ല. ഉന്നത പൊലീസ്‌സിവില്‍ ഡിഫന്‍സ് ഉദ്യോഗസ്ഥര്‍ സ്ഥലത്തത്തെി അന്വേഷണം ആരംഭിച്ചു.
പിങ്ക് കാരവണ്‍ ഡയറക്ടര്‍ കൂടിയായ അമീറ ബിന്‍കമര്‍(38) ഷാര്‍ജയിലെ പൊതുരംഗത്ത് വളരെ സജീവമായിരുന്നു. മാതാവിന് 57 വയസും സഹോദരിക്ക് 38 വയസ്സുമുണ്ട്. അമീറയുടെ മരണത്തില്‍ ഷാര്‍ജ ഭരണാധികാരിയുടെ പത്‌നി ശൈഖ ജവാഹിര്‍ ബിന്‍ത് മുഹമ്മദ് അല്‍ ഖാസിമി ട്വിറ്റര്‍ സന്ദേശത്തിലൂടെ അനുശോചനം അറിയിച്ചു.
No comments:
Post a Comment