പുതിയ 500 രൂപ നോട്ടിൽ ഗാന്ധിജിക്ക് രണ്ടു തല; തിരക്കിട്ട് അച്ചടിച്ചപ്പോഴുള്ള പിശകെന്ന് റിസർവ് ബാങ്ക്

ദില്ലി: നോട്ട് അസാധുവാക്കലിലൂടെ ആകെപ്പാടെ പുലിവാല് പിടിച്ച അവസ്ഥയിലാണ് പ്രധാനമന്ത്രി നരേന്ദ്ര മോദി. പുതിയ 500 രൂപ നോട്ടും ഇറങ്ങിയപ്പോൾ തലവേദന അൽപം കുറഞ്ഞെന്നു കരുതിയിരുന്നപ്പോഴാണ് ദാ അടുത്ത തലവേദന. പുതിയ 500 രൂപ നോട്ടിലും അച്ചടിപ്പിശക്. ഗുരുതരമായ പിഴവുകളാണ് പുതിയ നോട്ടിൽ സംഭവിച്ചിരിക്കുന്നത്. മറ്റൊന്നുമല്ല., പുതിയ നോട്ടുകളിൽ ഗാന്ധിജിക്ക് രണ്ടു തലയുണ്ട്. തിരക്കിട്ട് അച്ചടിച്ചപ്പോൾ ഉണ്ടായ പിശകാണെന്നാണ് റിസർവ് ബാങ്ക് പറയുന്നത്. നോട്ടിലെ പിഴവുകൾ ജനങ്ങൾക്ക് ആശങ്കയുണ്ടാക്കുമെന്നാണ് വിലയിരുത്തൽ. മാത്രമല്ല, കള്ളനോട്ടുകൾ വളരെപ്പെട്ടെന്ന് വ്യാപിക്കാനും ഇത് ഇടയാക്കുമെന്നു പറയപ്പെടുന്നു. മൂന്നു പിഴവുകളാണ് നോട്ടിൽ സംഭവിച്ചിട്ടുള്ളത്. ചില നോട്ടുകളിൽ ഗാന്ധിജിയുടെയും ദേശീയ ചിഹ്നത്തിന്റെയും ചിത്രങ്ങൾ ശരിയായ രീതിയിൽ പതിഞ്ഞിട്ടില്ല. ഗാന്ധിജിയുടെ മുഖത്തിന് നിഴലുകൾ പോലെ കാണപ്പെടുന്നുമുണ്ട്. ചില നോട്ടുകളിൽ സീരിയൽ നമ്പറുകളിലും പിശകുണ്ട്. ചില നോട്ടുകളുടെ അതിരുകളും തുല്യമല്ല. നിറത്തിലുമുണ്ട് വ്യത്യാസം. രണ്ട് നിറത്തിലുള്ള നോട്ടുകൾ ഇപ്പോൾ പ്രചാരത്തിലുണ്ട് ഇതു ജനങ്ങളെ അധികം പ്രയാസപ്പെടുത്തും.

തിരക്കിട്ട് അച്ചടിച്ചതു കൊണ്ടാണ് പിഴവുണ്ടായതെന്നാണ് റിസർവ് ബാങ്ക് അധികൃതർ പറയുന്നത്. പിശകുള്ള നോട്ടുകൾ ബാങ്ക് കൗണ്ടറുകളിൽ കൊടുത്ത് മാറ്റിയെടുക്കാമെന്ന് ആർബിഐ വക്താവ് അൽപന കിലാവാല പറഞ്ഞു. ഒരു തരത്തിലുള്ള 500 രൂപ നോട്ടുകളേ അച്ചടിക്കുന്നുള്ളൂ എന്ന് ആർബിഐ പറയുമ്പോൾ, ഒരുതരത്തിലുള്ള നോട്ടുകൾ മാത്രമേ ഉണ്ടാകാൻ പാടുള്ളൂവെന്ന് മുൻ ആഭ്യന്തര സെക്രട്ടറി ജി.കെ പിള്ള പറഞ്ഞു.