വാഷിംഗ്ടണ്‍: ഗ്യാലക്‌സി നോട്ട് 7 സ്മാര്‍ട്ട് ഫോണുകള്‍ പൊട്ടിത്തെറിച്ചതു മൂലമുണ്ടായ ക്ഷതത്തില്‍ നിന്ന് കരകയറാന്‍ ശ്രമം തുടരുന്നതിനിടെ സാംസങ്ങിന് വീണ്ടും തിരിച്ചടി. ഇത്തവണ വാഷിംഗ് മെഷീനുകളാണ് കമ്പനിക്ക് വിനയായത്. വാഷിംഗ് മെഷീനുകള്‍ പൊട്ടിത്തെറിക്കുന്നതായി അമേരിക്കയില്‍ കേസ് ഫയല്‍ ചെയ്തതാണ് ദക്ഷിണ കൊറിയന്‍ ഇലക്ട്രോണിക് ഭീമന് തിരിച്ചടിയായത്.
2011 മാര്‍ച്ചിനും 2016 ഏപ്രിലിനുമിടയില്‍ നിര്‍മിച്ച ടോപ് ലോഡ് വാഷിംഗ് മെഷീനുകളില്‍ ചിലതാണ് പ്രവര്‍ത്തിച്ചുകൊണ്ടിരിക്കുന്നതിനിടയില്‍ പൊട്ടിത്തെറിച്ചത്. അമേരിക്കയിലെ കണ്‍സ്യൂമര്‍ പ്രൊഡക്റ്റ് സേഫ്റ്റി കമ്മീഷനുമായി ഈ വിഷയത്തില്‍ ചര്‍ച്ചകള്‍ നടത്തി വരികയാണെന്ന് സാംസങ് അറിയിച്ചു.
വാട്ടര്‍ റെസിസ്റ്റന്റ് ആയതും കനമുള്ളതുമായ വസ്ത്രങ്ങള്‍ അലക്കുന്നതിനിടെയാണ് അപകടങ്ങള്‍ ഉണ്ടായത്. ഇത് ശ്രദ്ധയില്‍പ്പെട്ടതിനേത്തുടര്‍ന്ന് ഇത്തരം വസ്ത്രങ്ങള്‍ കഴുകുമ്പോള്‍ ഏറ്റവും കുറഞ്ഞ വേഗതയിലുള്ള മോഡ് ഉപയോഗിക്കാന്‍ ഉപഭോക്താക്കള്‍ക്ക് സാംസങ് നിര്‍ദേശം നല്‍കി.
ന്യൂജഴ്‌സിയിലാണ് വാഷിംഗ് മെഷീന്‍ പൊട്ടിത്തെറിച്ച് നാശനഷ്ടങ്ങള്‍ ഉണ്ടായതായി ആരോപിച്ച് കോടതിയില്‍ കേസ് ഫയല്‍ ചെയ്തത്. വാങ്ങി ഒരു മാസം മുതല്‍ ഒരു വര്‍ഷം വരെയായ മോഡലുകള്‍ പൊട്ടിത്തെറിച്ചതായാണ് കേസുകള്‍.
No comments:
Post a Comment